💻 مين ضيّع الإنترنت العربي؟

تبحث عن معلومة بالعربي، وتلقى منشور هنا، ومقطع هناك، وشخص يحكي عن تجربة ما تدري متى صارت. تحاول ترجع للمصدر، لكن الموقع اللي كان فيه الشرح أو التجربة اختفى.

طيب، وين راحت المواقع العربية؟ ووين المواضيع اللي الناس جلسوا سنين يكتبونها ويضيفون عليها؟

البعض يختصر الموضوع في إن العرب ما يكتبون، أو إن الناس ما عاد تقرأ. بس لو ترجع لبدايات الإنترنت العربي، بتلقى صورة مختلفة. كان عندنا مواقع وخدمات ومجتمعات كاملة، وبعضها بدأ قبل تأسيس شركات نستخدمها اليوم.

خلنا نرجع للبداية، ونشوف كيف وصلنا لهنا.

🔎 قبل تأسيس قوقل، كان عندنا «أين»

في 1997 ظهر موقع «أين»، وكان يجمع محرك بحث ودليل للمواقع العربية، وبعدها قدّم خدمات مثل البريد الإلكتروني والنقاشات وبطاقات التهنئة.

يعني تدخل موقع واحد، تبحث منه، وتكتشف مواقع ثانية، وتستخدم بريدك وتتواصل مع الناس.

وعشان تستوعب الفترة اللي نتكلم عنها، شركة قوقل نفسها تأسست في 1998، بعد ظهور «أين» بسنة.

هذا يوضح إننا كنا نبني خدمات للإنترنت بالعربي من بدري.

📧 وبعدين جاء «مكتوب»

بنهاية التسعينات، بدأ «سميح طوقان» و«حسام خوري» يشتغلون على فكرة بريد إلكتروني بالعربي. وبحسب رواية طوقان، بدأ المشروع التجريبي في 1999، وتسجّلت الشركة رسميًا في 2000.

كان يقولك ان الناس عندها هوت ميل، طيب ليه ما يكون عندنا بريد يناسب المستخدم العربي؟

ومع نمو مكتوب، توسعت الخدمات. في 2002 ظهرت «كاش يو»، خدمة دفع تخليك تشحن رصيد وتشتري من الإنترنت، حتى لو ما عندك بطاقة ائتمانية. كانت بطاقاتها تُباع عبر موزعين ومحلات، وتشحن منها حسابك وتستخدمه للدفع.

وبعدها، في 2005، بدأ «سوق.كوم» كموقع مزادات مرتبط بمكتوب، قبل ما يكبر ويصير متجر يعرفه أغلبنا.

يعني كان عندنا بحث وبريد ودفع وتجارة إلكترونية بشكل مستقل ، فيه شغل عربي قائم، وفيه ناس تستخدمه وتبني عليه.

🧳 والمنتديات كانت تجمع خبرات الناس

اللي عاش فترة المنتديات يعرف إيش نقصد.

تبغى تسافر؟ تدخل «العرب المسافرون»، وتلقى شخص مصوّر رحلته، وكاتب تفاصيل الفنادق والمواصلات والمصاريف، والناس تسأله وهو يجاوب.

تبغى نقاشات عن الأفلام؟ عندك «ديفيدي العرب». وللبيت والأسرة كانت فيه منتديات مثل «الفراشة» و«الحياة الزوجية»، وغيرها من المجتمعات المتخصصة.

كل موضوع يضيف شيء، وكل رد يصحح معلومة أو يكمّل تجربة. وبعد سنوات، يصير عندك أرشيف بناه الناس من وقتهم وخبراتهم.

والميزة إن الشخص اللي يجي بعدهم يقدر يلقى الموضوع ويستفيد منه، حتى لو صاحب معد يدخل المنتدى.

المكانة اللي نشوف البعض يعطيها ريديت اليوم، كانت موجودة عندنا مع هذي المجتمعات.

📦 هنا بدأ المحتوى يتجمّع عند جهة وحدة

مكتوب كبر، ودخل فيه مستثمرين. وفي 2005، استحوذت «أبراج كابيتال» على حصة 40% منه.

ومع التوسع، اشترى مكتوب مجموعة من المواقع والمنتديات العربية، ومنها أسماء صار يعتمد عليها ناس كثير في السفر والترفيه والأسرة.

من ناحية الشركة، هذا يعني جمهور أكبر ومحتوى أكثر. لكن من ناحية المستخدم، صار مستقبل عدة مجتمعات مرتبط بجهة وحدة.

تخيّل إنك تشارك في منتدى من سنوات، وبعد ما ينباع، يصير القرار في استمرار المكان اللي كتبت فيه كله بيد مالك جديد. وبعدها ممكن ينباع مرة ثانية، وأنت ما لك رأي في أي خطوة.

وهذا اللي صار مع مكتوب.

🤝 ياهو اشترت مكتوب… ومعه هذي المجتمعات

في 25 أغسطس 2009، أعلنت ياهو اتفاقها لشراء مكتوب، اللي كان عنده أكثر من 16.5 مليون مستخدم. واكتملت الصفقة في نوفمبر، بسعر يقارب 164 مليون دولار (حوالي 615 مليون ريال سعودي)، بحسب تقرير ياهو السنوي.

الكلام وقت الإعلان كان عن التوسع، وخدمات بالعربي، والجمع بين خبرة مكتوب وإمكانات ياهو.

لكن الصفقة ما شملت كل شركات المجموعة. «سوق.كوم» و«كاش يو» و«عربي» و«تحدي» انتقلت إلى «مجموعة جبار للإنترنت».

أما بوابة مكتوب والمجتمعات التابعة لها، فصارت تحت ياهو.

وهنا يجي السؤال: وش صار للمحتوى اللي الناس كتبته ؟

🗑️ بعد وعود التوسع، بدأت الإغلاقات

الإغلاقات صارت على مراحل. في 2010، ظهرت أخبار عن إغلاق ودمج 27 موقع. وقتها كانت إدارة ياهو مكتوب تقول إن الهدف تجميع الخدمات، وإن المحتوى بيظل موجود بمكان ثاني.

لكن اللي جاء بعدها كان إيقاف خدمات كاملة:

الموعد	اللي صار
31 مارس 2013	إغلاق خدمة مدونات مكتوب
15 ديسمبر 2014	إغلاق منتديات مكتوب

رسالة إغلاق المنتديات وضحت للمستخدمين إن معد بيقدرون يتفاعلون مع الخدمة أو يدخلون حساباتهم بعد بل دعتهم للانتقال إلى «تمبلر».

طيب، والسنين اللي كتبوا فيها؟ والتجارب والصور والنقاشات اللي الناس كتبتها في كل هذي السنوات؟

قرار الإغلاق قطع الوصول إلى هذي المجتمعات من أماكنها الأصلية. وصار الوصول إلى محتواها يعتمد على اللي انحفظ منها، أو نُقل، أو أعاد الناس كتابته بمواقع ثانية.

🧠 والخسارة تمتد لليوم

تخيّل إن شخص كتب تجربة مفصلة قبل 15 سنة، وبعدها الموقع اختفى. اليوم أنت تبحث عن نفس الموضوع، فتلقى واحد ينقل من ذاكرته، أو مقتطف ناقص، أو رابط ما يفتح.

ومع الوقت، اللي ما عاش هذي المرحلة ممكن يشوف قلة النتائج ويحسب إن العرب أصلًا ما كتبوا عن الموضوع. بينما فيه ناس كتبوا، وصوّروا، وشرحوا، لكن المكان اللي جمع شغلهم ما استمر.

ومع الذكاء الاصطناعي، أهمية المحتوى العربي تزيد. النماذج تحتاج بيانات تتعلم منها، وأدوات البحث تحتاج مصادر ترجع لها. إذا ما حافظنا على المحتوى الأصلي اللي يمثّل تجاربنا، بنقلل المادة اللي يقدر الناس والأنظمة يستفيدون منها.

والترجمة وحدها ما تعوّض تجربة شخص عربي يحكي عن بيئته واحتياجه ومشكلته بطريقته، وبنصير فقط ناخذ التجربة من شخص أجنبي لا يمتّ لتجربتنا ولا لثقافتنا لمجرد ان هذا هو الموجود .

✍️ طيب، إيش نقدر نسوي؟

في تيك فويس بدينا بتحويل هذي الحلقات إلى مقالات. نرجع للتاريخ، ونكتب الأسماء والتواريخ، ونحط المصادر، عشان اللي يبحث بعدنا يلقى شيء يقدر يرجع له.

ونقدر نكمّل بأشياء واضحة:

• 🗂️ نحافظ على أرشيف مواقعنا، ونخطط لنقله إذا تغيّرت المنصة أو توقفت الخدمة.
• ✍️ نحوّل التجارب والشروحات المفيدة إلى محتوى مكتوب يقدر الناس يبحثون عنه ويرجعون له.
• 🔎 نصحح المعلومات الناقصة، ونربطها بمصادرها، بدل ما يظل تاريخنا موزّع بين الذكريات.

اللي صار مع مكتوب يخلينا نسأل عن مستقبل أي محتوى نبنيه اليوم: لو تغيّر المالك، أو تقفلت المنصة، وين بيروح شغل الناس؟

نبي اللي يجي بعدنا يلقى تجاربنا وشروحاتنا وتاريخنا، ويكمل من المكان اللي وصلنا له.