تفتح قائمة أكثر اللغات انتشارًا، وتلقى الإنقليزي في المقدمة، والعربي بعده بكم مركز. تنزل تحت شوي، وتلقى «العربية المصرية» موجودة مرة ثانية، وتنزل أكثر وتلقى العربية الخليجية!
طيب، المصري والخليجي مو عرب؟ والرقم الأول يحسب مين بالضبط؟
ولو بحثت عن مصدر هذي التصنيفات في الصحف الغربية، بيتكرر قدامك اسم «إثنولوق». والمؤسف إن حتى صحف وحسابات عربية تنقل نفس الأرقام ونفس المصدر، وأحيانًا بدون ما تشرح لك كيف انحسبت.
وهنا في تيك فويس قلنا: خلنا نرجع للمصدر نفسه. مين «إثنولوق»؟ وكيف صار مرجع لترتيب لغات العالم؟ وليه العربي عنده موزّع على كل هذي الأسماء؟
🧑🔬 مين «إثنولوق»؟
«إثنولوق» مرجع يجمع معلومات عن لغات العالم. يعني يقول لك هذي اللغة وين يتكلمون فيها، وكم عدد اللي يستخدمونها، وهل الناس للحين يتعلمونها وينقلونها لعيالهم، أو بدأ استخدامها يقل.
الجهة اللي تنشره اسمها «SIL»، وكانت تُعرف باسم «المعهد الصيفي للغويات». ومع الوقت، صاروا الناس ووسائل الإعلام يرجعون لبياناته، ومنها طلعت قوائم اللغات اللي نشوفها اليوم.
بس بدايتهم ما كانت للغات اصلا او حتى ترتيب لغات العالم ونشوف مين الأول ومين الثاني.
✨ البداية كانت مع المبشّرين
خلنا نرجع لعام 1934. بنلقى مبشّر مسيحي أمريكي اسمه «ويليام كاميرون تاونسند» بدأ برنامجً يعلّم المبشّرين المسيحيين اللغات عشان ينشرون المسيحية، ومن هنا بدأت «SIL».
تاونسند كان يوزّع نسخ من كتابهم المسيحي بالإسبانية في غواتيمالا. بس اكتشف إن بعض الناس اللي يعطيهم هذي النسخ ما يفهمون إسباني أصلًا!
فصار يتعلّم لغتهم ويترجم لهم النصوص الدينية، وبعدها بدأ يدرّب أشخاص يسوّون نفس الشيء مع مجتمعات ثانية.
وفي 1942، تأسست «ويكليف لمترجمي الكتاب المسيحي»، عشان تساعد في توفير الدعم في الترجمة.
طيب، وين «إثنولوق» من هذا كله؟
أول إصدار لـ «إثنولوق» طلع في عام 1951 و كان عبارة عن عشر صفحات فيها معلومات عن 46 لغة أو مجموعة لغات، والهدف وقتها مشاركة معلومات عن ترجمة الإنجيل حول العالم.
🔍 هم ليسوا مصدرًا للغات كما تنقل الصحف عنهم
لأن شغل «SIL» جمع بين دراسة اللغات للتبشير المسيحي. وهذا خلّى كثير من الناس والجهات في عدة دول اللي اشتغلوا فيها يسألون: أنتم جايين تدرسون لغات الناس، أو تغيّرون معتقداتهم؟ وإيش تأثير شغلكم على حياتهم وثقافتهم؟
في البرازيل، بنهاية السبعينيات، قررت الجهات الحكومية ما تجدّد اتفاق التعاون معهم، وطلبت خروجهم من أراضي السكان الأصليين.
وفي 1981، الإكوادور أنهت عقدها مع المنظمة، وأعطتها سنة تكمّل تسلم مشاريعها لجهات إكوادورية.
ووصلت الاتهامات إلى ربط المنظمة بالاستخبارات الأمريكية.
حتى فيه دراسة منشورة في 2009، عنوانها بمعناه: «ما نبغى نتنكر بصفة لغويين»، تناقش تاريخ المنظمة وعلاقتها بالتبشير المسيحي وليس تصنيف اللغات.
🗂️ كيف يصنّفون العربية؟
لو تفتح قائمة «إثنولوق» لعام 2026، بتلقى الفصحى « الحديثة » في المركز الخامس، بحوالي 334.9 مليون مستخدم. وتنزل تحت، تلقى المصرية بالمركز 15، بحوالي 118.4 مليون.
والموضوع ما وقف عند المصرية. عندهم الخليجية والمغربية والنجدية والحجازية وغيرها، وكل وحدة يتعاملون معها كلغة مستقلة في التصنيف.
يعني حتى داخل السعودية، النجدي والحجازي والخليجي عندهم تصنيفات لغوية منفصلة!
في المقابل، الأمريكي والبريطاني والأسترالي يندرجون تحت الإنقليزي في قائمة اللغات. ما تلقى كل واحد منهم داخل الترتيب كلغة مستقلة بالطريقة اللي تشوفها مع العربية.
طيب، على أي أساس يقسمون العربية؟
من معاييرهم الأساسية: هل الشخصين يفهمون كلام بعض بدون ما يتعلمون طريقة كلام بعض من قبل؟ إذا ما يفهمون بعض، فهذا سبب عندهم لاعتبارها لغتين منفصلتين.
بس لحظة، أنا كخليجي أفهم المصري، والمصري يفهمني. فليش نطلع في التصنيف كل واحد يتكلم لغة لحالها؟ وين دخل الفهم اللي بيننا في هالحسبة؟ وكيف قاسوه أصلًا؟
والإنقليزي فيه اختلاف لهجات بعد، وممكن تتعب وأنت تحاول تفهم شخص يتكلم بلهجة ثقيلة عليك.
واللغة العربية مو الوحيدة اللي سوّوا معها كذا الصينية أيضًا موزّعينها على عدة تصنيفات، بدل ما تظهر كلها تحت اسم واحد في القائمة.
والمشكلة هنا تتجاوز اختلافنا معهم على التسمية عندهم أخطاء موثّقة في التصنيف نفسه.
في مراجعة علمية منشورة في 2015، فحص الباحث «هارالد هامارستروم» إصدارات من «إثنولوق»، وراجع عينة عشوائية من 100 تصنيف. وبحسب معيار الفهم المتبادل، وجد إن 21 منها يفترض تندمج مع تصنيفات ثانية.
يعني فيه مراجعة فعلية لقت إن تطبيق المعيار ما يطابق التصنيفات الموجودة. وانتقد الباحث أيضًا إن مصادر المعلومات ما كانت موضّحة بشكل منتظم، وهذا يصعّب على أي شخص يراجع وراهم.
وعندنا مثال ثاني أوضح في تصنيف اسمه «باباليا الكريولية العربية»، ورمزه «bbz». في 23 يناير 2020 أُلغي التصنيف، والسبب المسجّل إنه اصلا اللغة هذي اصلا ليست لغة موجودة.
اسم وله رمز ومدرج في السجل، وبعدين يُلغى لأنه غير موجود أصلًا!
ومع كل هذه الملاحظات لازالت الصحف العربية تنقل معيار «إثنولوق» وكأن موثوقيته مضمونة لمجرد أنه أجنبي.
📊 طيب، وش يصير للترتيب لو جمعنا اللهجات؟
هذي كانت نقطة مهمة في المقطع طريقة تقسيم اللغة تغيّر شكل الترتيب اللي يطلع لك.
في الحسبة التقريبية اللي عرضناها، وبإعادة تجميع أرقامهم، ظهر الترتيب بهذا الشكل:
| الترتيب | اللغة |
|---|---|
| 1 | الصينية |
| 2 | الإسبانية |
| 3 | العربية |
| 4 | الإنقليزي |
والشيء الواضح اللي نقدر نقوله رقم الفصحى لحالها ما يمثّل كل المتحدثين بالعربية ولهجاتها. واليونسكو تتحدث عن أكثر من 400 مليون شخص يستخدمون العربية يوميًا.
فإذا بتنشر ترتيب اللغة العربية وضّح للقارئ هل حسبت الفصحى؟ أو العربية بكل لهجاتها؟ وهل حسبت اللغة الأولى فقط، أو أضفت اللي تعلموها بعدين؟ او فقط تنقل كلام «إثنولوق» ؟
💻 طيب، وش دخل هذا بالتقنية؟
ممكن تقول: طيب، تغيّر ترتيبنا، ايش بيصير؟
تخيّل إن في شركة تدرس سوق معين عشان تطلق فيه منتج، أو تحدد اللغات اللي بتدعمها. يهمك تعرف حجم الجمهور اللي تقدر توصله. وإذا قرأت رقم الفصحى على إنه كل جمهور العربية، بتطلع بصورة ناقصة عن الناس اللي ممكن يستخدمون منتجك.
وبيانات اللغات تدخل فعلًا في شغل تقني. مشروع «CLDR» من «يونكود»، مثلًا، يستخدم بيانات اللغة والسكان للمساعدة في تحديد اللغات المناسبة لواجهات الكمبيوتر في مناطق مختلفة. والمشروع نفسه ينبّه إن «إثنولوق» لحاله ما يكفي لبيانات السكان في معظم اللغات.
عشان كذا يهمنا كيف تُعرض لغتنا في هذي البيانات، وكيف يفهمها اللي يبني عليها.
🛠️ إيش نقدر نسوي؟ إحنا بدينا
إحنا بدينا بهذا المقطع وهذا المقال رجعنا للمصدر، وفتحنا التصنيفات، وناقشنا الأرقام بدل ما ننسخ الترتيب ونمشي.
وفيه شغل قائم نقدر نبني عليه. «مركز ذكاء العربية» التابع لمجمع الملك سلمان العالمي للغة العربية يتيح للباحثين طلب نصوص ومعاجم وتسجيلات، عشان يستخدمونها في تدريب النماذج واختبارها.
خطوة مني، وخطوة منك، وتصحيح من شخص ثالث هذي كلها تتجمع حتى تُمثل اللغة العربية بأفضل طريقة
الأغرب من برنامج نشر المسيحية إلي تحول لمنظمة تصنيف لغات غريبة ، هو كيف كبرى الشركات الإعلامية و الصحفيين ينسخون أي شي تقوله المنظمة و ينشرونه بدون أي تأكد من المصدر .
فخور انه فيه محتوى من هذا النوع يوضح اشياء فعلًا غايبة عن كثيرين .
نحتاج خطوات من هذا النوع أكثر و أكثر جزاكم الله خير
انا اعتقد ان كبرى الشركات للأسف يهمها المصدر أكثر من مين صاحب المصدر ، دام انهم مصنفين نفسهم جهة لتصنيف اللغات ف الصحف و الشركات الكبيرة بتثق فيهم لأن المشاهد ما بيتأكد من مين الجهة
هلا عبدالله،
يسعدني ان المحتوى أعجبك 🙏🏻 القادم أفضل بلاشك.
للأمانه من أكثر المواضيع الي جاوبت على سؤال كبير عندي ومضايقني جدا يوم اشوف اللغة التركية على سبيل المثال في كل تطبيق وموقع وما الاقي العربية مع ان المتحدثين بالعربية أكثر بكثير ولازال موضوع العربي في التطبيقات مؤرقني لدرجة تواصلت مع مطور مستقل لتطبيق للماك وترجمت كامل البرنامج بالعربي بعدما وجدت تقبل من المطور وكل ذلك باستخدام الذكاء الاصطناعي مع مراجعة لكل شيء ومن هنا لمعت في راسي فكرة ليش ماتكون في منصة تبادر هذه المبادرة وتتواصل مع الشركات وتترجم المواقع والتطبيقات ترجمة غير مخلة بالمعني وهو امر قابل للتطبيق الان اكثر من اي وقت مضى مع الذكاء الاصطناعي واللغة العربية قادرة على استيعاب كل المصطلحات التقنية والعلمية أيضاً … يبقى حلماً ويبقى هذا المقال والحلقة على اليوتيوب أعظم ماشاهدت هذه السنه … لكم التحية
المبادرة فكرتها رائعة جداً جداً .. بلاشك إنه لو احد تبناها كثير من المطورين بيقبلونها
احيانا الموضوع بالنسبة لهم مجرد تكلفة 😁
هذا المقال والمقطع كذلك جهد كبير تشكرون عليه جدا
شيء يقهر لكن الوعي اول خطوات التحسن