تفتح الشوكولاتة اللي دايم تشتريها، تأخذ أول قطعة وتوقف شوي: لحظة، ليه طعمها تغيّر؟ نفس الاسم، ونفس الشركة، بس هذي مو النكهة اللي أعرفها!

عشان نفهم الموضوع، خلنا نرجع للمكوّن الأساسي « الكاكاو »

💸 الكاكاو ارتفع سعره … والشركات تدور التوفير

في 2024، ارتفعت أسعار الكاكاو بشكل كبير، وهذا رفع تكلفة صناعة الشوكولاتة.

فهنا الشركات توهقت ، قالت كيف نكسب بس المستهلك مايلاحظ ؟

فكان عندهم حل إن الشركة ترفع السعر؟ بس المشكلة ان عندهم حد لو رفعوه أكثر المستهلك بيعرف و بتنتبه للزيادة.
لكن في طريقة ثانية تصغّر المنتج، وتخليك تدفع نفس المبلغ مقابل كمية أقل.

وهذي الحركة صارت من قبل. في 2016، «توبليرون» وسّعت الفراغات بين المثلثات، وصار لوح الـ170 قرام يزن 150 قرام.

🧈 طيب، وش دخل هذا بالطعم؟

عشان الشركات تكسب أكبر قدر من الفلوس بدأت تدخل منتجات تعطي نفس القوام الي تعرفه بس بجودة أقل
مثل انهم يدخلون شبيه الكاكاو بدل الكاكاو وفيه بدائل نباتية تُستخدم لتقليل التكلفة أو تغيير خصائص المنتج.

وهذي المكونات الجديدة هي الي خلت الطعم يختلف لكن خلت الشركات تكسب أكثر.

🏷️ انتبه… مكتوب «شوكولاتة» أو «بنكهة الشوكولاتة»؟

اقلب الغلاف واقرأ اسم المنتج وبتعرف المنتج من اسمه اذا كان «شوكولاتة» او «شوكولاتة بالحليب» و«حلوى بنكهة الشوكولاتة» أو «شبيه الشوكولاتة» لأن نسبة الكاكاو تختلف داخل كل منتج

وحتى نسبة الكاكاو المطلوبة تختلف حسب النوع. في المعيار الدولي، شوكولاتة الحليب حدّها الأدنى 25٪ من الكاكاو، بينما فئة «الشوكولاتة» حدّها 35٪. يعني مو كل الأنواع لها نفس النسبة.

وايضا وجود دهون نباتية ونسبتها ايضا لها سبب في تغيير الطعم

🔎 ونفس المنتج من بلدين مختلفين؟

وعشان نتأكد اشترينا نفس المنتج من نفس الشركة. واحد مصنوع في البرازيل والثاني مصنوع في مصر.

قصّينا القطعتين وحطّيناها جنب بعض، وطلع الفرق واضح حتى في لون الحشوة. طيب، كيف نفس المنتج ممكن يفرق طعمه لدرجة إنك تحس إن وحدة جودتها أقل؟

الفرق ممكن يبدأ من نسبة المكونات. حتى لو شفت نفس المكونات على الغلافين، الشركة تقدر تستخدم كمية كاكاو أقل وسكر أكثر في نسخة، وتظل ضمن اشتراطات السوق اللي تبيع فيه. وإذا غيّرت نوع الدهون بعد، ممكن تلاحظ إن وحدة تذوب أسرع بفمك والثانية قوامها أقرب للشمع.

في المنتج الي جربناه حق البرازيل كان يستخدم « فول سوداني طازج » بينما حق مصر كان مكتوب « فول سوداني »

خذ البرازيل وبلجيكا مثلًا. وقت المقارنة، كان الحد الأدنى لفئة «الشوكولاتة» في البرازيل 25٪ من مواد الكاكاو الصلبة، وفي بلجيكا 35٪ للفئة العامة حسب المعيار الأوروبي. ولو وصلت نسختين للسعودية، الاثنين لازم يطابقون اشتراطاتنا، وممكن الاثنين يطابقونها وكل وحدة لها خلطة مختلفة. وحدة ممكن يكون طعم الكاكاو فيها أوضح، والثانية أحلى أو قوامها أثقل. وهذا يفرق في الطعم، وحتى في الجودة اللي تحس فيها وأنت تاكلها.

بالمختصر الشركات تبغى تربح أكثر، فتدور على تصنيع أرخص. وإذا اشتراطات السوق تعطيها مجال تقلّل الكاكاو أو تغيّر نسب المكونات، تقدر توفّر في الخلطة، وهنا يفرق الطعم حتى لو الاسم نفسه.