تخيّل ترسل سالفة تضحّك لواحد من الجيل الجديد، ويرد عليك بـ🐬. أنت للحين تفكّر وش دخل الدولفين بالسّالفة، وهو قاعد يقول لك إنه مات من الضحك.
ولما نقول الجيل الجديد هنا، نقصد جيل Z، اللي انولدوا تقريبًا بين 1997 و2012.
طيب، إذا الدولفين صار ضحكة، وش صار على 😂 اللي كنا نرسلها ونفهم بعض؟
😂 الضحكة صار لها أكثر من شكل
فيه ناس للحين يرسلون 😂، بس إذا أرسلت 🤣 يمكن يطقطقون عليك ويقولون «يا شايب». وعند البنات هذا 😭 يعني إن السالفة تضحّك، وإذا وصلت لذا💀 فأنت تقول إنك متّ من الضحك.
طيب، من وين جاء الدولفين؟ التفسير اللي ينقال إن صوته يشبه الضحكة.
🙂 الابتسامة اللي تخليك تراجع رسالتك
ترسل 👍 لواحد من الجيل الجديد وتقصد «تمام»، وهو يقراها كأنك تسلّك له وتبي تقفل السالفة. وترسل 🙂 وتحسب إنك لطّفت الرد، وهو يحسب إنك منزعج وما ودك تقولها صريحة.
ولو قال لك واحد منهم «أنت رهيب» وحط 🧢، لا تفرح بسرعة. الطاقية معناها «قاعد أكذب عليك». وإذا بنت وردت عليك بـ💅، فهي تقصد «أنا واثقه وما عليّ من أحد».
🥀 حتى القلب المكسور لقوا له بديل
يجيك واحد من الجيل الجديد ويكتب «الاختبار بكرة 🥀». أنت متعوّد تشوف 💔 في هذي المواقف، فتخيل انهم صاروا يستخدمون الوردة الذابلة بدل القلب المكسور.
وتخيّل إنك قفطت واحد منهم يسوي شي غلط وقلت له «ليه تسوي كذا؟». يمكن يرسل لك 🗿 ويسكت. يعني انقفط وما عنده تعليق.
🥺 طيب، هذي إيموجيات بنات؟
فيه ناس من جيل Z لو شافوك ترسل 😍 أو 🥺 أو حتى 💋، قالوا لك «أنت تستخدم هذي؟ وش وضعك؟». وأنا ودي أعرف، إذا هذي كلها للبنات، وش الإيموجي اللي بتحجزونه للشباب؟
اكتب لنا آخر خمسة في التعليقات. خلنا نشوف وش بنفهم منها.
🌚